GDP ng Canada tumaas noong unang quarter ng 2023

Ang real domestic gross product (GDP) ay tumaas ng 0.8% sa unang quarter ng 2023 matapos maging flat noong nakaraang quarter, iniulat ng Statistics Canada ngayong Miyerkules.

Lumaki ang pag-export ng goods and services ng 2.4% sa unang tatlong buwan ng kasalukuyang taon, matapos tumaas ng 0.5% sa ikaapat na quarter noong 2022. Ang pinakahuling paglago ay na-stimulate ng pag-export ng passenger cars at light trucks. Samantala, ang pag-aangkat ng good and services ay tumaas ng 0.2% matapos bumaba ng 3.3% noong huling quarter ng 2022.

Dagdag pa ng Statistics Canada matapos ang dalawang quarter ng bahagyang pag-unlad, tumaas ang household spending sa goods and services sa unang quarter ng 2023.

Kinalkula ng pederal na ahensya na ang ekonomiya ng Canada ay lumaki sa annualized rate na 3.1% noong unang quarter. Ipinapakita ng huling datos na nalampasan ng pag-unlad ang sariling forecast ng Statistics Canada na nasa 2.5% para sa naturang quarter.

Ang patuloy na katatagan ng ekonomiya ay malamang magbubunsod ng posibleng rate hike, habang ang Bank of Canada ay inaasahang mag-aanunsyo tungkol sa interest rate sa susunod na linggo.

Isang artikulo ng The Canadian Press na isinalin sa Tagalog ni Catherine Dona.