1. Home
  2. Pandaigdig
  3. International Relations

Royal Visit: Charles at Camilla sinimulan ang Canadian tour sa St. John’s

Prince Charles at Camilla sinalubong sa St. John's.

Prince Charles at Camilla, Duchess of Cornwall, dumating sa St. John's para simulan ang tatlong araw na Canadian tour, ngayong Martes, Mayo 17, 2022.

Litrato: The Canadian Press / Paul Chiasson

RCI

Dumating na sa Canada ang royal couple

Sina Prince Charles at Camilla ay dumating sa Newfoundland and Labrador para simulan ang kanilang tatlong araw na Canadian tour sa St. John's.

Ang royal couple, na lumapag bago mag-1:30 n.h. NT ngayong Martes, ay binati ni Lt.-Gov. Judy Foote at mga dignitaryo matapos bumaba sa eroplano.

Pagkatapos nagtungo sina Charles at Camilla sa Confederation Building, kung saan nagtipon-tipon ang mga tao para sa opening ceremony ng tour. Isang rendition ng Ordinary Day ng Great Big Sea ang tumugtog habang binati sina Charles at Camilla nina Prime Minister Justin Trudeau, Premier Andrew Furey, mga Indigenous na pinuno at iba pa.

Ang welcome ceremony ay nagsimula sa pamamagitan ng isang dasal na binasa sa wikang Innu ng elder na si Elizabeth Penashue bago kumanta si Inuk classical singer Deantha Edmunds ng folk song na Sons of Labrador.

Nagsalita rin si Gov. Gen. Mary Simon sa seremonya. Binigyang-diin ni Simon ang rekonsilyasyon sa kanyang talumpati.

Hinihikayat ko kayo na kausapin ang Indigenous peoples, pakinggan ang kanilang mga istorya, ang kanilang mga tagumpay, at ang kanilang mga solusyon, at hinihikayat ko kayo na alamin ang katotohanan ng aming kasaysayan, ang mabuti at ang masama, aniya. Sa paraan na ito magkakaroon ng paghilom, pag-unawa at respeto.

Hindi tulad ng kanilang huling pagbisita sa Newfoundland at Labrador, 13 taon na ang nakaraan, sina Charles at Camilla ay hindi dadalo sa anumang malaking indoor events. Sa halip, ang itinerary ay batay sa tatlong components — ang lahat ay mangyayari ng sunod-sunod ngayong hapon — at lahat ng public events ay gaganapin outdoors.

Ang Indigenous na rekonsilyasyon, na inaasahang magiging pokus ng tour, ang magiging tema buong araw.

Ang royals ay tutungo sa Government House sa loob ng isang sandali ng pagmumuni-muni sa Heart Garden, na itinanim para alalahanin ang mga biktima ng residential schools at kanilang mga pamilya. Ang mga nais na makiisa ay hindi maaaring pumarada sa lugar, ngunit maaaring i-drop off sa Military Road, at hinihiling na dumating ng alas-dos ng hapon.

Doon, ilalaan ng royal pair ang kanilang oras sa isang seremonya na pangungunahan ng mga lider ng Indigenous communities ng Newfoundland and Labrador. Ang mga kinatawan ng Nunatsiavut, Qalipu, NunatuKavut at Miawpukek ay inimbitahan — bagama’t si Johannes Lampe, ang presidente ng Nunatsiavut, ay magiging busy sa swearing-in ceremony at hindi makakadalo sinabi niya sa CBC News.

Sina Charles at Camilla ay tatapusin ang kanilang maikling pagbisita sa Quidi Vidi Village, kung saan si Charles — isang matibay na tagasuporta ng wool industry — ay makikipagkita sa crafts producers sa Artisan Studios bago maglakad sa paligid ng harbour at tatapusin ang tour sa Quidi Vidi Brewery.

Tinawag na isang malaking karangalan ni Justin Fong na may-ari ng brewery ang pagbisita, at binanggit na maaaring i-pull ng royal couple ang kanilang sariling mga draft.

Titingnan natin kung maaari natin ituro sa mag-asawa mula sa U.K. kung paano magsalin ng pint, natatawang sabi ni Fong.

Ang publiko ay inimbitahan sa Quidi Vidi at hiniling na dumating ng alas-tres ng hapon. Isang shuttle bus service ang tatakbo sa pagitan ng Dominion parking lot at ng wharf.

Isasara ng siyudad ang Cadet Road, Barrows Road, Maple View Place at Stone's Road bago dumating ang mga royal. Ang parking ay magiging available sa Cuckold's Cove Road at mga parking lot sa paligid ng Quidi Vidi Lake.

Sina Charles at Camilla ay bibisita sa Ottawa sa Miyerkules at sa Yellowknife at Dettah, N.W.T., sa Huwebes.

Ang pagbisita ay ‘makabuluhan’ sabi ni Prime Minister Trudeau

Ang tour ang ika-19 na beses na bumisita si Charles sa Canada, at ang una mula nang magkaroon ng wave ng republicanism sa Caribbean noong unang bahagi ng taon.

Sinabi ni Prime Minister Justin Trudeau, na bumibisita rin sa St. John's ngayong Martes ng umaga, sa mga reporter na hindi siya nakakarinig ng anti-monarchy sentiment mula sa Canadians at sinabi na wine-welcome niya ang pagbisita nina Charles at Camilla.

Alam ko na magiging makabuluhan ito para sa maraming tao dito, ani Trudeau. Habang tinitingnan natin ang mga hamon na hinaharap ng ating mga demokratikong institusyon sa buong mundo, sa palagay ko maaari tayong maging masaya dahil mayroon tayong isang stable na sistema.

Iniwasan ni Trudeau ang diretsahan na tanong kung naniniwala siya na ang royals ay dapat humingi ng tawad sa residential school survivors, gayunpaman, at sa halip ay nagsalita siya kung paano umaasa ang kanyang gobyerno na ang Prince at Duchess ay gagamitin ang pagbisitang ito bilang oportunidad para pag-usapan ang Indigenous reconciliation at mapakinggan ang lahat ng klase ng Canadians mula sa iba’t-ibang backgrounds.

Ngunit sinabi ni federal New Democratic Party Leader Jagmeet Singh na sinusuportahan niya ang hiling ng Indigenous na mga komunidad para sa isang apology mula sa monarchy para sa papel na kanilang ginampanan sa residential school system.

Isang artikulo ng CBC News na isinalin sa Tagalog ni Catherine Dona.

Mga Ulo ng Balita