ਪੰਜਾਬੀ ਮੂਲ ਦੀ ਜੈਸ ਔਜਲਾ ਵੱਲੋਂ ਲਿਖਿਆ ਨਾਵਲ ਚਰਚਾ ਵਿੱਚ

ਔਜਲਾ ਦਾ ਜਨਮ ਭਾਰਤ ਵਿੱਚ ਹੋਇਆ ਹੈ ਅਤੇ ਉਹ ਦੋ ਸਾਲ ਦੀ ਉਮਰ ਵਿੱਚ ਕੈਨੇਡਾ ਆ ਗਏ ਸਨ I ਜੈਸ ਔਜਲਾ ਟੋਰੌਂਟੋ ਵਸਨੀਕ ਹਨ ਅਤੇ ਬੈਂਕਿੰਗ ਖ਼ੇਤਰ ਨਾਲ ਜੁੜੇ ਹੋਏ ਹਨ I 

ਰੋਮਾਂਚ ਭਰਪੂਰ ਨਾਵਲ

ਨੈਕਸਟ ਆਫ਼ ਟਵਿੰਨ ਦੋ ਜੁੜਵਾ ਭੈਣਾਂ ਦੀ ਕਹਾਣੀ ਹੈ ਜੋ ਕਿ ਭਾਰਤ ਵਿੱਚ ਜੰਮੀਆਂ ਹਨ ਪਰ ਅਲੱਗ ਹੋ ਜਾਂਦੀਆਂ ਹਨ I ਇਹਨਾਂ ਵਿੱਚੋਂ ਇਕ ਭੈਣ ਲੁੱਟ ਮਾਰ ਕਰਕੇ ਆਪਣਾ ਗ਼ੁਜ਼ਾਰਾ ਕਰਦੀ ਹੈ ਅਤੇ ਦੂਸਰੀ ਵਧੀਆ ਜ਼ਿੰਦਗੀ ਗੁਜ਼ਾਰ ਰਹੀ ਹੁੰਦੀ ਹੈ I 

ਕਹਾਣੀ ਵਿੱਚ ਇਟਲੀ ਵਿੱਚ ਰਹਿੰਦੀ ਰਿਆ ਅਰੋੜਾ ਆਪਣੀ ਸੇਨ ਫ੍ਰਾਂਸਿਸਕੋ ਰਹਿੰਦੀ ਭੈਣ , ਅੰਜਲੀ ਮਰਫ਼ੀ ਨੂੰ ਲੱਭ ਕੇ ਮਿਲਣ ਆਉਂਦੀ ਹੈ I ਇਸ ਦੌਰਾਨ ਹੀ ਅੰਜਲੀ ਦੇ ਘਰਵਾਲੇ ਦੀ ਮੌਤ ਹੋ ਜਾਂਦੀ ਹੈ ਅਤੇ ਰਿਆ ਹਸਪਤਾਲ ਵਿੱਚ ਹੁੰਦੀ ਹੈ ਅਤੇ ਉਸਨੂੰ ਅੰਜਲੀ ਸਮਝ ਲਿਆ ਜਾਂਦਾ ਹੈ I

ਪਾਠਕ ਅੰਤ ਵਿੱਚ ਕਾਤਲ ਬਾਰੇ ਪੜ ਕੇ ਹੈਰਾਨ ਹੁੰਦੇ ਹਨ I ਕਿਤਾਬ ਦੀ ਪਾਠਕ ਮਧੂ ਦਾ ਕਹਿਣਾ ਹੈ ਕਿ ਹਰ ਪਾਤਰ ਨੂੰ ਕਹਾਣੀ ਵਿਚ ਬਹੁਤ ਹੀ ਸ਼ਾਨਦਾਰ ਢੰਗ ਨਾਲ ਬੁਣਿਆ ਗਿਆ ਹੈ I ਮਧੂ ਮੁਤਾਬਿਕ ਅੰਤ ਤੱਕ ਕਹਾਣੀ ਕਈ ਮੋੜ ਲੈਂਦੀ ਹੈ ਅਤੇ ਹੈਰਾਨ ਕਰਦੀ ਰਹਿੰਦੀ ਹੈ I 

ਇਹ ਨਾਵਲ ਅੰਗਰੇਜ਼ੀ ਭਾਸ਼ਾ ਵਿੱਚ ਹੈ ਅਤੇ ਐਮਾਜ਼ਾਨ , ਇੰਡੀਗੋ ਸਮੇਤ ਵੱਖ ਵੱਖ ਸਟੋਰਾਂ 'ਤੇ ਉਪਲਬਧ ਹੈ I 

ਬਚਪਨ ਵਿੱਚ ਪਿਆ ਲਿਖਣ ਦਾ ਸ਼ੌਂਕ

ਰੇਡੀਓ ਕੈਨੇਡਾ ਇੰਟਰਨੈਸ਼ਨਲ ਨਾਲ ਗੱਲਬਾਤ ਦੌਰਾਨ ਜੈਸ ਔਜਲਾ ਨੇ ਕਿਹਾ ਕਿ ਉਹਨਾਂ ਨੂੰ ਲਿਖਣ ਅਤੇ ਕਿਤਾਬਾਂ ਪੜਨ ਦਾ ਸ਼ੌਂਕ ਬਚਪਨ ਵਿੱਚ ਪੈ ਗਿਆ ਸੀ I 

ਔਜਲਾ ਦੇ ਮਾਪੇ ਕੈਨੇਡਾ ਵਿੱਚ ਇਮੀਗ੍ਰੈਂਟ ਦੇ ਤੌਰ 'ਤੇ ਆਏ ਸਨ I ਔਜਲਾ ਨੇ ਕਿਹਾ ਮੇਰੇ ਮਾਪਿਆਂ ਨੇ ਕੈਨੇਡਾ ਵਿੱਚ ਆ ਕੇ ਬਹੁਤ ਪਰਿਵਾਰ ਚਲਾਉਣ ਲਈ ਬਹੁਤ ਮੁਸ਼ੱਕਤ ਕੀਤੀ I ਜਦੋਂ ਉਹ ਮੇਰੇ ਨਾਲ ਨਹੀਂ ਹੁੰਦੇ ਸਨ ਤਾਂ ਮੈਂ ਕਿਤਾਬਾਂ ਪੜਨੀਆਂ ਸ਼ੁਰੂ ਕੀਤੀਆਂ ਅਤੇ ਇਸ ਤਰ੍ਹਾਂ ਹੌਲੀ ਹੌਲੀ ਮੇਰੀ ਦਿਲਚਸਪੀ ਵਧਦੀ ਗਈ I

ਜੈਸ ਔਜਲਾ ਦਾ ਕਹਿਣਾ ਹੈ ਕਿ ਉਹਨਾਂ ਨੇ ਆਪਣੀ ਪਹਿਲੀ ਕਹਾਣੀ ਅੱਠ ਸਾਲ ਦੀ ਉਮਰ ਵਿੱਚ ਲਿਖੀ ਸੀ I

ਇਹ ਵੀ ਪੜ੍ਹੋ :

• ‘ਕਿਤਾਬਾਂ ‘ਤੇ ਪਾਬੰਦੀਆਂ ਦਾ ਹਰਜਾਨਾ ਨੌਜਵਾਨ ਪਾਠਕ ਭੁਗਤਦੇ ਹਨ’ : ਰੂਪੀ ਕੌਰ
• ਬਲਵਿੰਦਰ ਸਿੰਘ ਗਰੇਵਾਲ ਨੇ ਜਿੱਤਿਆ ਢਾਹਾਂ ਸਾਹਿਤ ਪੁਰਸਕਾਰ

ਔਜਲਾ ਨੇ ਕਿਹਾ ਮੈਂ ਇਕ ਸਕੂਲ ਪ੍ਰੋਜੈਕਟ ਲਈ ਅੱਠ ਸਾਲ ਦੀ ਉਮਰ ਵਿੱਚ ਆਪਣੀ ਪਹਿਲੀ ਕਹਾਣੀ ਲਿਖੀ ਸੀ I ਹੌਲੀ ਹੌਲੀ ਇਸ ਨਾਲ ਮੇਰੀ ਦਿਲਚਸਪੀ ਵਧਦੀ ਗਈ I

ਜੈਸ ਔਜਲਾ ਸ਼ੁਰੂ ਵਿੱਚ ਕਵਿਤਾਵਾਂ ਲਿਖਦੇ ਰਹੇ ਹਨ ਅਤੇ ਉਹਨਾਂ ਦੀਆ ਕਵਿਤਾਵਾਂ ਵੱਖ ਵੱਖ ਰਸਾਲਿਆਂ ਵਿੱਚ ਛਪ ਚੁੱਕੀਆਂ ਹਨ I ਉਹਨਾਂ ਕਿਹਾ ਕੈਨੇਡਾ ਵਿੱਚ ਆਉਣ ਤੋਂ ਬਾਅਦ ਮੈਂ ਆਪਣੀਆਂ ਭਾਵਨਾਵਾਂ ਨੂੰ ਕਵਿਤਾਵਾਂ ਰਾਹੀਂ ਕਾਗਜ਼ 'ਤੇ ਉਤਾਰਦੀ ਸੀ I ਮੇਰੀਆਂ ਰਚਨਾਵਾਂ ਅਲੱਗ ਅਲੱਗ ਰਸਾਲਿਆਂ ਵਿੱਚ ਛਪ ਚੁੱਕੀਆਂ ਹਨ I

ਨੈਕਸਟ ਆਫ਼ ਟਵਿੰਨ ਬਾਰੇ ਗੱਲਬਾਤ ਕਰਦਿਆਂ ਜੈਸ ਔਜਲਾ ਨੇ ਕਿਹਾ ਕਿ ਉਹਨਾਂ ਦਾ ਨਿੱਜੀ ਜ਼ਿੰਦਗੀ ਵਿੱਚ ਇਸ ਕਹਾਣੀ ਨਾਲ ਕੋਈ ਸਿੱਧਾ ਰਾਬਤਾ ਨਹੀਂ ਹੈ I ਉਹਨਾਂ ਕਿਹਾ ਮੈਨੂੰ ਖ਼ਬਰਾਂ ਪੜਨ ਦਾ ਸ਼ੌਂਕ ਹੈ ਅਤੇ ਮੈਂ ਆਪਣੇ ਆਲੇ ਦੁਆਲੇ ਬਾਰੇ ਹੋਰ ਜਾਣਕਾਰੀ ਇੱਕਤਰ ਕਰਨ ਦੀ ਕੋਸ਼ਿਸ਼ ਕਰਦੀ ਹਾਂ I

ਔਜਲਾ ਨੇ ਕਿਹਾ ਮੈਂ ਇਕ ਜੁੜਵਾ ਭੈਣਾਂ ਬਾਰੇ ਅਜਿਹੀ ਹੀ ਖ਼ਬਰ ਵੀ ਪੜੀ ਸੀ , ਜਿਸਤੋਂ ਬਾਅਦ ਮੈਂ ਅਜਿਹੀ ਇਕ ਕਹਾਣੀ ਉੱਪਰ ਕੰਮ ਕਰਨ ਦਾ ਸੋਚਿਆ I

ਪਰਿਵਾਰ ਦਾ ਸਾਥ

ਆਪਣੀਆਂ ਚੁਣੌਤੀਆਂ ਬਾਰੇ ਗੱਲਬਾਤ ਕਰਦਿਆਂ ਜੈਸ ਔਜਲਾ ਨੇ ਕਿਹਾ ਕਿ ਇਕ ਲੇਖਕ ਅਤੇ ਔਰਤ ਦੇ ਸਾਹਮਣੇ ਬਹੁਤ ਸਾਰੀਆਂ ਚੁਣੌਤੀਆਂ ਹੁੰਦੀਆਂ ਹਨ I

ਤਸਵੀਰ ਵੱਡੀ ਕਰੋ (ਨਵੀਂ ਵਿੰਡੋ)

ਔਜਲਾ ਨੇ ਕਿਹਾ ਕਿਤਾਬ ਨੂੰ ਲਿਖਣਾ ਬਹੁਤ ਚੁਣੌਤੀ ਭਰਿਆ ਕੰਮ ਸੀ I ਕਿਤਾਬ ਲਿਖਣ ਤੋਂ ਲੈ ਕੇ ਛਾਪਣ ਤੱਕ ਵੱਖ ਵੱਖ ਪੜਾਵਾਂ ਵਿੱਚੋਂ ਗੁਜ਼ਰਨਾ ਪਿਆ ਅਤੇ ਇਸ ਦੌਰਾਨ ਕੰਮ ਅਤੇ ਪਰਿਵਾਰ ਨੂੰ ਵੀ ਦੇਖਣਾ ਪਿਆ I 

ਔਜਲਾ ਦਾ ਕਹਿਣਾ ਹੈ ਕਿ ਉਹਨਾਂ ਦੀ ਲੇਖਣੀ ਨੂੰ ਪਰਿਵਾਰ ਵੱਲੋਂ ਬਹੁਤ ਸਮਰਥਨ ਮਿਲਦਾ ਹੈ ਅਤੇ ਪਰਿਵਾਰ ਦੇ ਸਮਰਥਨ ਬਗ਼ੈਰ ਕਿਤਾਬ ਲਿਖਣਾ ਸੰਭਵ ਨਹੀਂ ਸੀ I 

ਜੈਸ ਔਜਲਾ ਅਤੇ ਉਹਨਾਂ ਦੀ ਕਿਤਾਬ ਬਾਰੇ ਵਧੇਰੇ ਜਾਣਕਾਰੀ ਇੱਥੋਂ ਹਾਸਿਲ  (ਨਵੀਂ ਵਿੰਡੋ)ਕਰੋ I