ਫ਼ੈਡਰਲ ਸਰਕਾਰ ਨੇ ਵਿਦੇਸ਼ੀ ਨਾਗਰਿਕਾਂ ਲਈ ਪ੍ਰੌਪਰਟੀ ਖ਼ਰੀਦਣ ‘ਤੇ ਲੱਗੀ ਪਾਬੰਦੀ ‘ਚ ਲਿਆਂਦੀ ਕੁਝ ਨਰਮੀ

ਕੈਨੇਡਾ ਵਿਚ ਵਰਕ ਪਰਮਿਟ ‘ਤੇ ਮੌਜੂਦ ਲੋਕ ਜਾਂ ਜਿਹੜੇ ਇਥੇ ਕੰਮ ਕਰਨ ਲਈ ਅਧਿਕਾਰਤ ਹਨ, ਉਹ ਹੁਣ ਰਿਹਾਈਸ਼ੀ ਪ੍ਰੌਪਰਟੀ ਖ਼ਰੀਦ ਸਕਦੇ ਹਨ। ਇਹਨਾਂ ਵਿਦੇਸ਼ੀਆਂ ਦੇ ਵਰਕ ਪਰਮਿਟ ਵਿਚ ਘੱਟੋ ਘੱਟ 183 ਦਿਨ ਬਾਕੀ ਹੋਣੇ ਚਾਹੀਦੇ ਹਨ ਅਤੇ ਉਹ ਯੋਗ ਹੋਣ ਲਈ ਸਿਰਫ਼ ਇੱਕ ਪ੍ਰੌਪਰਟੀ ਹੀ ਖ਼ਰੀਦ ਸਕਦੇ ਹਨ।

ਗ਼ੈਰ-ਕੈਨੇਡੀਅਨ ਅਤੇ ਵਿਦੇਸ਼ੀ ਕਾਰੋਬਾਰੀ ਵੀ ਹੁਣ ਰਿਹਾਇਸ਼ੀ ਪ੍ਰੌਪਰਟੀ ਖ਼ਰੀਦ ਸਕਦੇ ਹਨ ਜੇਕਰ ਉਹ ਇਸ ਨੂੰ ਵਿਕਸਤ ਕਰਨ ਦਾ ਇਰਾਦਾ ਰੱਖਦੇ ਹਨ, ਅਤੇ ਉਹ ਰਿਹਾਇਸ਼ੀ ਜਾਂ ਮਿਸ਼ਰਤ ਵਰਤੋਂ ਲਈ ਜ਼ੋਨ ਕੀਤੀ ਗਈ ਖ਼ਾਲੀ ਜ਼ਮੀਨ ਵੀ ਖ਼ਰੀਦ ਸਕਦੇ ਹਨ।

ਪਾਰਲੀਮੈਂਟ ਨੇ ਜੂਨ 2022 ਵਿਚ ਗ਼ੈਰ-ਕੈਨੇਡੀਅਨਜ਼ ‘ਤੇ ਪ੍ਰੌਪਰਟੀ ਖ਼ਰੀਦਣ ‘ਤੇ ਰੋਕ ਲਗਾਉਣ ਲਈ ਇੱਕ ਕਾਨੂੰਨ (Prohibition on the Purchase of Residential Property by Non-Canadians Act) ਪਾਸ ਕੀਤਾ ਸੀ। ਇਹ ਕਾਨੂੰਨ ਇਸ ਸਾਲ ਦੇ ਸ਼ੁਰੂ ਵਿਚ ਲਾਗੂ ਹੋ ਗਿਆ ਹੈ ਅਤੇ ਇਸ ਵਿਚ ਵਿਦੇਸ਼ੀਆਂ ਨੂੰ ਰਿਹਾਇਸ਼ੀ ਪ੍ਰੌਪਰਟੀ ਖ਼ਰੀਦਣ ‘ਤੇ 2 ਸਾਲ ਦੀ ਪਾਬੰਦੀ ਲਗਾਈ ਗਈ ਹੈ। ਇਹ ਪਾਬੰਦੀਆਂ 2021 ਦੀ ਫ਼ੈਡਰਲ ਚੋਣ ਮੁਹਿੰਮ ਦੌਰਾਨ ਲਿਬਰਲਾਂ ਵੱਲੋਂ ਘਰਾਂ ਦੀਆਂ ਵਧਦੀਆਂ ਕੀਮਤਾਂ ਦੇ ਉਪਾਅ ਵੱਜੋਂ ਕੀਤੇ ਵਾਅਦੇ ਦਾ ਹਿੱਸਾ ਸਨ।

• ਕੈਨੇਡਾ ਚ ਵਿਦੇਸ਼ੀਆਂ ‘ਤੇ ਘਰ ਖ਼ਰੀਦਣ ਦੀ ਪਾਬੰਦੀ ਤੋਂ ਕਈ ਵਰਕਰਾਂ ਤੇ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਨੂੰ ਛੋਟ

ਮਿਨਿਸਟਰ ਔਫ਼ ਹਾਊਸਿੰਗ, ਡਾਇਵਰਸਿਟੀ ਐਂਡ ਇੰਕਲੂਜ਼ਨ, ਅਹਿਮਦ ਹੁਸੈਨ ਨੇ ਸੋਮਵਾਰ ਨੂੰ ਉਕਤ ਤਬਦੀਲੀਆਂ ਦਾ ਐਲਾਨ ਕੀਤਾ। ਕੈਨੇਡਾ ਮੌਰਗੇਜ ਐਂਡ ਹਾਊਸਿੰਗ ਕਾਰਪੋਰੇਸ਼ਨ (CMHC) ਦੀ ਇੱਕ ਨਿਊਜ਼ ਰਿਲੀਜ਼ (ਨਵੀਂ ਵਿੰਡੋ) ਅਨੁਸਾਰ ਉਕਤ ਤਬਦੀਲੀਆਂ ਤੁਰੰਤ ਪ੍ਰਭਾਵੀ ਹੋ ਗਈਆਂ ਹਨ।

ਮਿਨਿਸਟਰ ਹੁਸੈਨ ਨੇ ਕਿਹਾ, ਇਹ ਸੋਧਾਂ ਨਵੇਂ ਆਉਣ ਵਾਲੇ ਲੋਕਾਂ ਨੂੰ ਕੈਨੇਡਾ ਦੇ ਸ਼ਹਿਰਾਂ ਵਿੱਚ ਰਿਹਾਇਸ਼ ਦੀ ਸਪਲਾਈ ਨੂੰ ਵਧਾਉਣ, ਕਾਰੋਬਾਰਾਂ ਨੂੰ ਨੌਕਰੀਆਂ ਪੈਦਾ ਕਰਨ ਅਤੇ ਲੋਕਾਂ ਨੂੰ ਕੈਨੇਡਾ ਵਿਚ ਆਪਣਾ ਘਰ ਬਣਾਕੇ ਆਪਣੀ ਜੜ੍ਹਾਂ ਲਾਉਣ ਦੀ ਇਜਾਜ਼ਤ ਦੇਣਗੀਆਂ।

ਇਹ ਸੋਧਾਂ ਇਹ ਯਕੀਨੀ ਬਣਾਉਣ ਲਈ ਸਹੀ ਸੰਤੁਲਨ ਬਣਾਉਂਦੀਆਂ ਹਨ ਕਿ ਵਿਦੇਸ਼ੀ ਨਿਵੇਸ਼ਕਾਂ ਦੁਆਰਾ ਮੁਨਾਫ਼ੇ ਲਈ ਕੀਤੇ ਨਿਵੇਸ਼ ਦੀ ਬਜਾਏ, ਕੈਨੇਡਾ ਵਿੱਚ ਰਹਿਣ ਵਾਲੇ ਲੋਕਾਂ ਲਈ ਰਿਹਾਇਸ਼ ਦੀ ਵਰਤੋਂ ਕੀਤੀ ਜਾਵੇ।

ਰਿਚਰਡ ਰੇਅਕਰਾਫ਼ਟ - ਸੀਬੀਸੀ ਨਿਊਜ਼
ਪੰਜਾਬੀ ਰੂਪਾਂਤਰ - ਤਾਬਿਸ਼ ਨਕਵੀ, ਸੀਨੀਅਰ ਰਾਈਟਰ, ਰੇਡੀਓ ਕੈਨੇਡਾ ਇੰਟਰਨੈਸ਼ਨਲ