- ਮੁੱਖ ਪੰਨਾ
- ਵਾਤਾਵਰਨ
- ਪਰਿਆਵਰਣ ਪ੍ਰਣਾਲੀ ਦੀ ਰੱਖਿਆ ਕਰਨਾ
ਮੌਂਟਰੀਅਲ ਵਿਚ ‘ਸਿੰਗਲ-ਯੂਜ਼ ਪਲਾਸਟਿਕ’ ‘ਤੇ ਪਾਬੰਦੀ ਲਾਗੂ
ਕਰੀਬ 8,400 ਕਾਰੋਬਾਰ ਪ੍ਰਭਾਵਿਤ ਹੋਣਗੇ
ਮੌਂਟਰੀਅਲ ਦੀ ਮਿਉਂਸਿਪਲ ਸਰਕਾਰ ਵੱਲੋਂ ਸਿੰਗਲ ਯੂਜ਼ ‘ਤੇ ਪਾਬੰਦੀ ਲਗਾਉਣ ਦਾ ਨਿਯਮ ਅੱਜ ਤੋਂ ਪ੍ਰਭਾਵੀ ਹੋ ਗਿਆ ਹੈ।
ਤਸਵੀਰ: La Presse canadienne
ਮੌਂਟਰੀਅਲ ਦੀ ਮਿਉਂਸਿਪਲ ਸਰਕਾਰ ਵੱਲੋਂ ਸਿੰਗਲ ਯੂਜ਼ ਭਾਵ ਇੱਕੋ ਵਾਰ ਵਰਤੀਆਂ ਜਾਣ ਵਾਲੀਆਂ ਪਲਾਸਟਿਕ ਦੀਆਂ ਵਸਤਾਂ ‘ਤੇ ਪਾਬੰਦੀ ਲਗਾਉਣ ਦਾ ਨਿਯਮ ਹੁਣ ਪ੍ਰਭਾਵੀ ਹੋ ਗਿਆ ਹੈ। ਨਵੇਂ ਬਾਏ-ਲਾਅ (ਮਿਉਂਸਿਪਲ ਕਾਨੂੰਨ) ਤਹਿਤ ਪਲਾਸਟਿਕ ਦੇ ਗਲਾਸ, ਸਟਿਰ-ਸਟਿਕ, ਸਟ੍ਰੋਅ ਅਤੇ ਪਲਾਸਟਿਕ ਦੇ ਬਰਤਨਾਂ ਸਣੇ ਕਈ ਆਇਟਮਾਂ ‘ਤੇ ਪਾਬੰਦੀ ਲਗਾਈ ਗਈ ਹੈ।
ਇਹ ਪਾਬੰਦੀ ਪੌਲਿਸਟ੍ਰਿਨ ਜਾਂ ਕੰਪੋਸਟੇਬਲ ਪਲਾਸਟਿਕ ਉਤਪਾਦਾਂ ‘ਤੇ ਵੀ ਲਾਗੂ ਹੈ, ਪਰ ਮੀਟ ਅਤੇ ਮੱਛੀ ਨੂੰ ਪੈਕ ਕਰਨ ਲਈ ਟ੍ਰੇਜ਼ ਨੂੰ ਛੋਟ ਦਿੱਤੀ ਗਈ ਹੈ।
ਇਹ ਨਵਾਂ ਬਾਏ-ਲਾਅ 18 ਮਹੀਨੇ ਪਹਿਲਾਂ ਪਾਸ ਕੀਤਾ ਗਿਆ ਸੀ ਅਤੇ ਇਹ 19 ਬੌਰੋਜ਼ (ਸਥਾਨਕ ਪ੍ਰਸ਼ਾਸਨਿਕ ਇਕਾਈਆਂ) ਨੂੰ ਕਵਰ ਕਰਦਾ ਹੈ, ਜੋ ਮਿਲਕੇ ਮੌਂਟਰੀਅਲ ਸ਼ਹਿਰ ਬਣਾਉਂਦੇ ਹਨ। ਅਧਿਕਾਰੀਆਂ ਦਾ ਅਨੁਮਾਨ ਹੈ ਕਿ ਇਸ ਕਾਨੂੰਨ ਨਾਲ ਕਰੀਬ 8,400 ਕਾਰੋਬਾਰ ਪ੍ਰਭਾਵਿਤ ਹੋਣਗੇ।
ਨੌਨ-ਪ੍ਰੌਫ਼ਿਟ ਸੰਸਥਾਵਾਂ ਵੱਲੋਂ ਖਾਣ-ਪੀਣ ਦੀਆਂ ਚੀਜ਼ਾਂ ਵੰਡਣ ਲਈ ਸਿੰਗਲ ਯੂਜ਼ ਪਲਾਸਟਿਕ ਦੇ ਇਸਤੇਮਾਲ ਨੂੰ ਛੋਟ ਦਿੱਤੀ ਗਈ ਹੈ।
ਸਿਟੀ ਦੀ ਵਾਤਾਵਰਣ ਪਰਿਵਰਤਨ ਬਾਬਤ ਕਾਰਜਕਾਰੀ ਕਮੇਟੀ ਦੀ ਮੈਂਬਰ, ਮੈਰੀ-ਔਂਡਰੇ ਮੌਗੇ ਦਾ ਕਹਿਣਾ ਹੈ ਕਿ ਸਿਟੀ ਪ੍ਰਸ਼ਾਸਨ ਵਪਾਰੀਆਂ ਨੂੰ ਆਪਣੇ ਪੁਰਾਣੇ ਸਟਾਕ ਨੂੰ ਕੱਢਣ ਦੀ ਇਜਾਜ਼ਤ ਦੇਣ ਲਈ ਨਰਮੀ ਦਿਖਾਏਗਾ।
ਮੈਰੀ ਨੇ ਪਿਛਲੇ ਹਫ਼ਤੇ ਰਿਪੋਰਟਰਾਂ ਨਾਲ ਗੱਲ ਕਰਦਿਆਂ ਕਿਹਾ ਸੀ ਕਿ ਮੌਂਟਰੀਅਲ ਦੀ ਇੱਕੋ ਇੱਕ ਲੈਂਡਫ਼ਿਲ (ਕੂੜਾ ਇਕੱਠਾ ਹੋਣ ਦੀ ਥਾਂ) 2029 ਤੱਕ ਆਪਣੀ ਪੂਰਨ ਸਮਰੱਥਾ ‘ਤੇ ਪਹੁੰਚ ਜਾਵੇਗੀ, ਇਸ ਕਰਕੇ ਕੂੜੇ ਨੂੰ ਘਟਾਉਣ ਤੋਂ ਇਲਾਵਾ ਹੋਰ ਕੋਈ ਚਾਰਾ ਨ੍ਹੀਂ ਹੈ।
ਮੈਰੀ ਨੇ ਕਿਹਾ ਕਿ ਸਾਨੂੰ ਈਕੋ-ਸਿਸਟਮ ਦੀਆਂ ਸੀਮਾਵਾਂ ਦਾ ਆਦਰ ਕਰਨਾ ਚਾਹੀਦਾ ਹੈ।
ਦ ਕੈਨੇਡੀਅਨ ਪ੍ਰੈੱਸ
ਪੰਜਾਬੀ ਰੂਪਾਂਤਰ - ਤਾਬਿਸ਼ ਨਕਵੀ, ਸੀਨੀਅਰ ਰਾਈਟਰ, ਰੇਡੀਓ ਕੈਨੇਡਾ ਇੰਟਰਨੈਸ਼ਨਲ
