[ ਰਿਪੋਰਟ ] ਕੈਨੇਡਾ ਨੇ ਕੱਢਿਆ ਐਕਸਪ੍ਰੈਸ ਐਂਟਰੀ ਦਾ ਵੱਡਾ ਡਰਾਅ

ਵੱਡਾ ਡਰਾਅ

ਇਸ ਵਾਰ 7000 ਬਿਨੈਕਾਰਾਂ ਨੂੰ ਇਨਵੀਟੇਸ਼ਨ (ਪੀ ਆਰ ਅਪਲਾਈ ਕਰਨ ਲਈ ਸੱਦਾ ) ਭੇਜੇ ਗਏ ਹਨ I ਆਮ ਤੌਰ 'ਤੇ ਇਹ ਅੰਕੜਾ 3500 ਦੇ ਆਸ ਪਾਸ ਰਹਿੰਦਾ ਹੈ I 

ਇਸਤੋਂ ਪਹਿਲਾਂ 2021 ਦੌਰਾਨ 27 ਹਜ਼ਾਰ ਵਿਅਕਤੀਆਂ ਨੂੰ ਇਨਵੀਟੇਸ਼ਨ ਭੇਜੇ ਗਏ ਸਨ ਅਤੇ ਸਕੋਰ ਸਿਰਫ਼ 85 ਰਹਿ ਗਿਆ ਸੀ I 

ਵੱਡੀ ਪੱਧਰ 'ਤੇ ਇਨਵੀਟੇਸ਼ਨ ਆਉਣ ਨਾਲ ਸਕੋਰ ਵੀ 500 ਤੋਂ ਥੱਲੇ ਡਿੱਗ ਗਿਆ ਹੈ I ਇਸ ਵਾਰ 490 ਅੰਕਾਂ ਵਾਲੇ ਬਿਨੈਕਾਰਾਂ ਨੂੰ ਇਨਵੀਟੇਸ਼ਨ ਭੇਜੇ ਗਏ ਹਨ I

ਦੱਸਣਯੋਗ ਹੈ ਕਿ ਐਕਸਪ੍ਰੈਸ ਐਂਟਰੀ ਦੇ ਡਰਾਅ ਵਧੇਰੇ ਅੰਕਾਂ 'ਤੇ ਆਉਣ ਕਾਰਨ ਬਹੁਤ ਸਾਰੇ ਬਿਨੈਕਾਰਾਂ ਦੇ ਹੱਥ ਨਿਰਾਸ਼ਾ ਲੱਗ ਰਹੀ ਸੀ ਕਿਉਂਕਿ ਬਹੁਤੇ ਵਿਦਿਆਰਥੀਆਂ ਦੇ ਅੰਕ 500 ਤੋਂ ਹੇਠਾਂ ਹਨ I ਇਸ ਸਾਲ ਦੇ ਡਰਾਅ 500 ਤੋਂ ਉੱਪਰ ਹੀ ਰਹਿ ਰਹੇ ਹਨ I

ਤਸਵੀਰ ਵੱਡੀ ਕਰੋ (ਨਵੀਂ ਵਿੰਡੋ)

ਇਮੀਗ੍ਰੇਸ਼ਨ ਮਾਹਰਾਂ ਦਾ ਕਹਿਣਾ ਹੈ ਕਿ ਐਕਸਪ੍ਰੈਸ ਐਂਟਰੀ ਦੇ ਡਰਾਅ ਹੌਲੀ ਹੌਲੀ ਥੱਲੇ ਆ ਰਹੇ ਹਨ ਜੋ ਕਿ ਬਿਨੈਕਾਰਾਂ ਲਈ ਇਕ ਵਧੀਆ ਖ਼ਬਰ ਹੈ I 

ਕੋਵਿਡ ਦੌਰਾਨ ਬੰਦ ਹੋ ਗਏ ਸਨ ਡਰਾਅ

ਕੋਵਿਡ ਦੇ ਚਲਦਿਆਂ , ਕੈਨੇਡਾ ਵੱਲੋਂ ਦਸੰਬਰ 2020 ਤੋਂ ਬਾਅਦ ਡਰਾਅ 'ਤੇ ਰੋਕ ਲਗਾ ਦਿੱਤੀ ਗਈ ਸੀ I ਐਕਸਪ੍ਰੈਸ ਐਂਟਰੀ ਦੀ ਕੈਨੇਡੀਅਨ ਐਕਸਪੀਰੀਐਂਸ ਕਲਾਸ ਦੇ ਡਰਾਅ ਹੀ ਨਿਕਲੇ I ਅਜਿਹੇ ਵਿਚ ਸਕੋਰ ਬਹੁਤ ਵੱਧ ਗਿਆ ਸੀ I 

ਇਮੀਗ੍ਰੇਸ਼ਨ ਮੰਤਰਾਲੇ ਵੱਲੋਂ ਜੁਲਾਈ 2022 ਦੌਰਾਨ ਕਰੀਬ ਡੇਢ ਸਾਲ ਦੇ ਵਕਫ਼ੇ ਬਾਅਦ ਐਕਸਪ੍ਰੈਸ ਐਂਟਰੀ ਦੇ ਡਰਾਅ ਮੁੜ ਤੋਂ ਸ਼ੁਰੂ ਕੀਤੇ ਗਏ ਸਨ I  ਜੁਲਾਈ 2022 ਦੌਰਾਨ ਆਏ ਡਰਾਅ ਦਾ ਸਕੋਰ 557 ਸੀ I 

ਕੀ ਹੈ ਐਕਸਪ੍ਰੈਸ ਐਂਟਰੀ

ਐਕਸਪ੍ਰੈਸ ਐਂਟਰੀ (ਨਵੀਂ ਵਿੰਡੋ) ਇਕ ਅਜਿਹਾ ਪ੍ਰੋਗਰਾਮ ਹੈ ਜਿਸ ਰਾਹੀਂ ਕੈਨੇਡਾ ਤੋਂ ਬਾਹਰ ਬੈਠੇ ਹੁਨਰਮੰਦ ਵਿਅਕਤੀ ਸਿੱਧੇ ਤੌਰ 'ਤੇ ਕੈਨੇਡਾ ਦੀ ਪਰਮਾਨੈਂਟ ਰੈਜ਼ੀਡੈਂਸੀ ਹਾਸਿਲ ਕਰ ਸਕਦੇ ਹਨ I ਇਸ ਵਿੱਚ ਬਿਨੈਕਾਰਾਂ ਨੂੰ ਉਮਰ , ਪੜਾਈ , ਤਜਰਬੇ ਅਤੇ ਆਇਲਟਸ (IELTS) ਆਦਿ ਦੇ ਨੰਬਰ ਮਿਲਦੇ ਹਨ I ਕੈਨੇਡਾ ਵਿੱਚ ਪੜਾਈ ਕਰ ਚੁੱਕੇ ਵਿਦਿਆਰਥੀ ਅਤੇ ਕੱਚੇ ਕਾਮੇ ਵੀ ਇਸ ਪ੍ਰੋਗਰਾਮ ਤਹਿਤ ਪੀ ਆਰ ਲੈ ਸਕਦੇ ਹਨ I

ਇਹ ਵੀ ਪੜ੍ਹੋ :

• ਮੈਨੀਟੋਬਾ ਸਰਕਾਰ ਵੱਲੋਂ ਪ੍ਰੋਵਿੰਸ਼ੀਅਲ ਨੌਮੀਨੀ ਪ੍ਰੋਗਰਾਮ ਵਿਚ ਵਾਧੇ ਦਾ ਐਲਾਨ
• ਜਾਣੋ ਕੀ ਹਨ ਵਿਜ਼ਿਟਰ ਵੀਜ਼ੇ ’ਤੇ ਆ ਕੇ ਕੈਨੇਡਾ ਵਿਚ ਵਰਕ ਪਰਮਿਟ ਲੈਣ ਬਾਬਤ ਨਿਯਮ
• ਇਮੀਗ੍ਰੇਸ਼ਨ ਵਿਭਾਗ ਕੋਲ ਸਮੇਂ ਸਿਰ ਅਰਜ਼ੀਆਂ ਦੇ ਨਿਪਟਾਰੇ ਲਈ ਲੋੜੀਂਦਾ ਸਟਾਫ਼ ਮੌਜੂਦ: ਪੀਬੀਓ

ਇਸ ਪ੍ਰੋਗਰਾਮ ਦੀ ਸ਼ੁਰੂਆਤ 2015 ਵਿੱਚ ਹੋਈ ਸੀ I  ਐਕਸਪ੍ਰੈਸ ਐਂਟਰੀ ਅਧੀਨ , ਬਿਨੈਕਾਰ ਨੂੰ ਇਮੀਗ੍ਰੇਸ਼ਨ ਮੰਤਰਾਲੇ ਤੋਂ ਇਨਵੀਟੇਸ਼ਨ ਮਿਲਣ ਦੇ ਕੁਝ ਮਹੀਨਿਆਂ ਅੰਦਰ ਹੀ ਕੈਨੇਡਾ ਦੀ ਪੀ ਆਰ ਮਿਲ ਜਾਂਦੀ ਸੀ I  ਇਸ ਪ੍ਰੋਗਰਾਮ ਦੇ ਪ੍ਰਚਲਿਤ ਹੋਣ ਦਾ ਇਕ ਕਾਰਨ ਇਹ ਵੀ ਹੈ ਕਿ ਇਸ ਵਿੱਚ ਅਰਜ਼ੀ ਦਾ ਬਹੁਤ ਥੋੜੇ ਸਮੇਂ ਵਿੱਚ ਨਿਪਟਾਰਾ ਕੀਤਾ ਜਾਂਦਾ ਹੈ I   

ਹੋਏ ਹਨ ਕੁਝ ਬਦਲਾਅ

ਮੰਤਰਾਲੇ ਵੱਲੋਂ ਐਕਸਪ੍ਰੈਸ ਐਂਟਰੀ ਸਿਸਟਮ ਵਿੱਚ ਹਾਲ ਵਿੱਚ ਹੀ ਕੁਝ ਬਦਲਾਅ ਕੀਤੇ ਗਏ ਹਨ I ਅਪਲਾਈ ਕਰਨ ਲਈ 2021 ਦੀ ਨੈਸ਼ਨਲ ਆਕੂਪੇਸ਼ਨਲ ਕਲਾਸੀਫ਼ਿਕੇਸ਼ਨ (NOC) ਦੀ ਵਰਤੋਂ ਕੀਤੀ ਜਾਂਦੀ ਹੈ I ਇਸਤੋਂ ਪਹਿਲਾਂ 2016 NOC ਦੀ ਵਰਤੋਂ ਕੀਤੀ ਜਾਂਦੀ ਸੀ I  

ਆਸਾਨ ਭਾਸ਼ਾ ਵਿੱਚ NOC ਰਾਸ਼ਟਰੀ ਵਰਗੀਕਰਣ ਢਾਂਚਾ ਹੈ ਜੋ ਅਲੱਗ ਅਲੱਗ ਨੌਕਰੀਆਂ ਨੂੰ ਅਲੱਗ ਅਲੱਗ ਲੈਵਲ ਵਿੱਚ ਵੰਡਦਾ ਹੈ I

ਨਵੇਂ ਸਿਸਟਮ ਵਿੱਚ ਨੌਕਰੀਆਂ ਨੂੰ 5 ਸ਼੍ਰੇਣੀਆਂ ਵਿੱਚ ਵੰਡਿਆ ਗਿਆ ਹੈ , ਜਿਸਨੂੰ ਕਿ ਟੀਅਰ ਸਿਸਟਮ ਕਿਹਾ ਜਾਂਦਾ ਹੈ I ਮੈਨੇਜਮੈਂਟ ਵਾਲੇ ਕੰਮ ਟੀਅਰ 0 ਵਿੱਚ ਆਉਂਦੇ ਹਨ I ਯੂਨੀਵਰਸਿਟੀ ਡਿਗਰੀ ਲੋੜੀਂਦੇ ਕੰਮ ਟੀਅਰ 1 ਵਿੱਚ ਵੱਢਣਗੇ ਗਏ ਹਨ I ਡਿਪਲੋਮਾ ਜਾਂ ਇਸ ਲੈਵਲ ਦੀ ਪੜ੍ਹਾਈ ਦੀ ਮੰਗ ਕਰਨ ਵਾਲੀਆਂ ਨੌਕਰੀਆਂ ਨੂੰ ਟੀਅਰ 2 ਅਤੇ 3 ਵਿੱਚ ਵੰਡਿਆ ਗਿਆ ਹੈ I

ਇਸਤੋਂ ਇਲਾਵਾ ਨਵੰਬਰ 2022 ਦੌਰਾਨ ਨਰਸ ਸਹਾਇਕ , ਐਲੀਮੈਂਟਰੀ ਅਤੇ ਸੈਕੰਡਰੀ ਸਕੂਲ ਅਧਿਆਪਕ ਸਹਾਇਕ ਟਰਾਂਸਪੋਰਟ ਟਰੱਕ ਡਰਾਈਵਰ ਜਿਹੇ 16 ਕਿੱਤਿਆਂ ਨੂੰ ਐਕਸਪ੍ਰੈਸ ਐਂਟਰੀ ਵਿੱਚ ਸ਼ਾਮਿਲ ਕੀਤਾ ਗਿਆ ਸੀ I ਇਹਨਾਂ ਕਿੱਤਿਆਂ ਵਿੱਚ ਕੰਮ ਕਰਨ ਵਾਲੇ ਵਿਅਕਤੀ ਪਹਿਲਾਂ ਐਕਸਪ੍ਰੈਸ ਐਂਟਰੀ ਅਧੀਨ ਅਪਲਾਈ ਨਹੀਂ ਕਰ ਸਕਦੇ ਸਨ I 

ਕੈਨੇਡੀਅਨ ਇਮੀਗ੍ਰੇਸ਼ਨ ਮੰਤਰਾਲੇ ਨੇ ਹਾਲ ਵਿੱਚ ਹੀ ਐਲਾਨ ਕੀਤਾ ਸੀ ਕਿ ਐਕਸਪ੍ਰੈਸ ਐਂਟਰੀ ਦੇ ਕੈਨੇਡੀਅਨ ਐਕਸਪੀਰੀਐਂਸ ਕਲਾਸ , ਫ਼ੈਡਰਲ ਟਰੇਡ ਵਰਕਰ ਅਤੇ ਫ਼ੈਡਰਲ ਸਕਿਲਡ ਵਰਕਰ ਅਧੀਨ ਅਰਜ਼ੀ ਲਾਉਣ ਵਾਲੇ ਬਿਨੈਕਾਰ ਹੁਣ ਆਪਣੀ ਅਰਜ਼ੀ ਨੂੰ ਔਨਲਾਈਨ ਟਰੈਕ ਕਰ ਸਕਣਗੇ I 

ਦੱਸਣਯੋਗ ਹੈ ਕਿ ਕੈਨੇਡਾ ਵੱਲੋਂ ਸਾਲ 2022 ਦੌਰਾਨ 4 ਲੱਖ 31 ਹਜ਼ਾਰ ਤੋਂ ਵਧੇਰੇ ਵਿਅਕਤੀਆਂ ਨੂੰ ਪੀ ਆਰ ਦੇਣ ਦੀ ਯੋਜਨਾ ਸੀ ਜਦਕਿ 2023 ਦੌਰਾਨ 4 ਲੱਖ 65 ਹਜ਼ਾਰ ਬਿਨੈਕਾਰਾਂ ਨੂੰ ਪੀ ਆਰ ਦੇਣ ਦਾ ਟੀਚਾ ਹੈ I